Qızıl Xaçın Xankəndi ofisi niyə Bakıya yox, İrəvana tabedir?

Azərbaycanın vətəndaş cəmiyyəti təmsilçiləri Beynəlxalq Qızıl Xaç Komitəsinə açıq məktubla müraciət ediblər.

Onlar Komitənin prezidenti Mirjana Spoljariç Eqqerə təşkilatın Azərbaycandakı fəaliyyətindən ciddi narahat olduqlarını bildiriblər.

Qeyd olunub ki, 30 ildən çoxdur ki, BQXK Azərbaycanda fəaliyyət göstərir. 4 minə yaxın azərbaycanlı Ermənistanın ölkəmizə qarşı təcavüzü nəticəsində itkin düşsə də, ötən dövr ərzində onların taleyi barədə təşkilatın nəzərəçarpacaq uğurları olmayıb.

Bildirilib ki, 1990-cı illərdə BQXK 54 azərbaycanlı əsirlə bağlı izə düşüb, Ermənistanla dialoq nəticəsində onlardan 17-nin meyitlərini alaraq Azərbaycana təhvil verib. Ancaq həmin siyahı üzrə 37 nəfərin taleyi hələ də bilinmir.

“Onlar sağdırlar, yoxsa öldürülüblər, öldürülüblərsə, meyitləri niyə ailələrinə təhvil verilməyib? BQXK niyə bu məsələ ilə yaxından məşğul olmur?”, – deyə müraciətdə bildirilib.

Qeyd olunub ki, komitə özünü müstəqil, bitərəf və qərəzsiz təşkilat hesab etdiyi halda Azərbaycana münasibətdə bu əsas prinsiplərin pozulması başadüşülən deyil.

Müraciətdə vurğulanıb ki, 2000-ci illərdə BQXK Azərbaycan hökuməti ilə razılaşdırmadan onun suveren ərazisi olan Xankəndidə ofis təşkil edib və bu barədə qondarma, separatçı rejimlə “saziş” imzalayıb.

Azərbaycan tərəfinin dəfələrlə rəsmi müraciətlərinə baxmayaraq, həmin “saziş” konfidensiallıq adı altında gizlədilib, təqdim edilməyib. Sonradan məlum olub ki, komitənin Xankəndi ofisi təşkilatın Bakıdakı nümayəndəliyinə deyil, İrəvandakı nümayəndəliyinə tabe etdirilib.

Azərbaycan vətəndaş cəmiyyətinin təmsilçiləri həmişə müstəqil və bitərəf qalmalı olan BQXK-nin bu davranışını onun tərəf tutması kimi qəbul edir. Komitə rəhbərliyinə müraciət edənlər təşkilatı Ermənistanın manipulyasiyasının alətinə çevrilməməyə, ədalətsiz açıqlamalar verməməyə çağırır. BQXK-dən Xankəndi ofisinin tamamilə Bakı nümayəndəliyinə tabe etdirilməsi gözlənilir.

Vətəndaş cəmiyyətinin üzvləri inanır ki, komitə mümkün olan ən qısa bir vaxtda qeyd olunan məsələləri Cenevrədəki baş ofisində gündəliyinə çıxaracaq, konstruktiv qərarlar qəbul edəcək və Azərbaycanla bağlı fəaliyyətində zəruri düzəlişlər edəcək.