Qucaqdan-qucağa düşməyə öyrəncəli olan ermənilər yeni qucaqda | Qərbi Azərbaycan Xronikası

“Qərbi Azərbaycan Xronikası” layihəsi çərçivəsində “Rusiya cəhənnəmlik olsun, bu ölkə haqqında heç nə eşitmək istəmirik” adlı süjet efirə gedib.

Verilişdə bir neçə gündür Ermənistanın yük maşınlarının Şimali Osetiya ilə Gürcüstan arasında sərhəd-buraxılış məntəqəsi olan “Lars”da saxlanmasına, məntəqədə qalan məhsullarla dolu yük maşınlarının geri Ermənistana qayıtmasına, bununla bağlı erməni jurnalistlərin hazırladığı reportajda son vaxtlar rəsmi İrəvanın Rusiyaya üz çevirməsi ilə bağlı fikirlərə yer verilir.

Erməni sürücülər bildiriblər ki, insanlar mallarını Ermənistandan aparır, amma rusiyalılar məhsulları geri qaytarırlar:

“Bu, siyasi oyundur, ruslar sadəcə olaraq ermənilərdən qisas almaq istəyirlər. Ermənistan hökuməti Rusiya ilə münasibətləri korlayıb. Neçə gündür məhsullarla dolu maşınlar “Lars” keçid məntəqəsində dayanır. Bütün mallar xarab olub. Bütün bunları Rusiya qəsdən edir. Bununla onlar Ermənistanı diz çökdürmək istəyirlər.

Onlar bizə başa salmaq istəyirlər ki, bizim müstəqil qərar vermək haqqımız yoxdur. Onlar özləri sanksiyalar altındadırlar, ona görə bizə də sanksiyalar tətbiq etmək istəyirlər. Tezliklə bu insanlar, sürücülər acından, soyuqdan öləcəklər. Ermənistanın özünə aid heç nəyi yoxdur. Qaz, elektrik enerjisi və çox şey Rusiyaya məxsusdur. Biz dözməliyik, başqa çıxış yolumuz yoxdur”.

Vurğulanıb ki, qucaqdan-qucağa gəzməyə öyrənən ermənilər növbəti dəfə Rusiyaya arxa çevirib, Qərbə qucaq açırlar:

“KTMT-nin yardım etməməsi bəhanədir. Elə Qərbin düzəltdiyi doqquz min kvadrat kilometrlik “Ararat Respublikası”nın ərazisini 29 min kvadrat kilometrə çatdıran, qərbi azərbaycanlıların öz tarixi Vətənindən qovulmasını bir neçə dəfə təşkil edən, ona havadarlıq edən Rusiya olub. İndi Rusiyanın sanksiyalarla üzləşdiyini görən ermənilər bəhanə tapıb, məşuqunu dəyişmək yolunu tutublar”.