"Azərbaycana ehtiyacımız var" | "Euronews"un sədri ölkəmizin sahib olduğu reallıqları vurğuladı

“Azərbaycan güclü infrastruktura, strateji coğrafi mövqeyə və enerji təhlükəsizliyi baxımından əvəzolunmaz əhəmiyyətə malikdir”.

Bunu Bakıda “Euronews”un yeni yerli ofisinin açılışında çıxış edən Direktorlar Şurasının sədri Pedro Varqas David deyib.

O bildirib ki, Azərbaycan əvvəllər qapalı olan bir çox sahələri artıq sərmayə üçün əlçatan edib:

“Mən də bu investisiyanın bir hissəsi olmaq istəyirəm. Bu, sabit, sülh içində olan, ərazi bütövlüyünü tam təmin etmiş və çox maraqlı imkanlar yaradan bir ölkəyə baxmaq üçün ən doğru zamandır”.

“Euronews” rəhbəri Azərbaycanın eyni zamanda kəşf edilməli bir turizm ölkəsi olduğunu qeyd edib: “Bütün dünya Bakının necə gözəl şəhər olduğunu bilir, amma Azərbaycan yalnız Bakıdan ibarət deyil. Ölkədə kəşf ediləsi çox yer var”.

Pedro Varqas David həmçinin Azərbaycanın yeni xizək kurortları ilə qurduğu tərəfdaşlığın qış mövsümündə ölkəyə turist axınının artmasına ciddi töhfə verəcəyini qeyd edib.

Sonda o bildirib ki, Azərbaycan bu il “Euronews”da daha çox görünəcək, çünki Azərbaycan Turizm Bürosu kanalla qış mövsümü üzrə rəsmi tərəfdaşlıq edir:

“Dünyada və Avropada doğru auditoriyalara doğru hekayəni çatdırmaq lazımdır”.