"Bu ifadə elə qalmaqal yaratdı ki..." | "Euronews"un sədri tarixi həqiqətlərdən danışdı

“Azərbaycana ilk dəfə 10 ildən çox əvvəl gəlmişəm. O vaxtdan bu günə qədər ölkənin necə böyük inkişaf yolu keçdiyini, necə dəyişdiyini öz gözlərimlə görmüşəm”.

Bunu Bakıda “Euronews”un yeni yerli ofisinin açılışında çıxış edən Direktorlar Şurasının sədri Pedro Varqas David deyib.

O bildirib ki, “Euronews”un Azərbaycanla tərəfdaşlığı səbəbilə uzun illər əsassız hücumlara məruz qalıblar:

“Bizə qarşı keçirilən yeganə etiraz aksiyası məhz bu əməkdaşlığa görə idi. Mən həmişə işçilərimizə demişəm ki, bu hücumlar ədalətsizdir, çünki biz balanslıyıq. Amma uzun müddət Avropada Azərbaycana münasibətdə balanslı olmaq norma belə sayılmırdı”.

Direktorlar Şurasının sədri qeyd edib ki, “Euronews”un məşhur verilişlərindən birində çəkiliş məkanında “Şuşa, Azərbaycan” sözlərinin görünməsi belə böyük qalmaqala səbəb olmuşdu: “Bu ifadə böyük qalmaqal yaratdı – yenə etirazlar, yenə e-poçt hücumları...”.

O, çıxışında Laçın dəhlizi məsələsinə də toxunub: “O zaman bir çox media “dəhliz bağlıdır” deyirdi. Halbuki orada olan yeganə beynəlxalq media komandası biz idik və dəhliz açıq idi.

Biz bunu gözümüzlə gördük. Həqiqəti göstərmək bəzən çətin olurdu, amma bu bizim missiyamız idi və bu gün də missiyamız olaraq qalır”.