"Azərbaycanın dəstəyi elə güclüdür ki..." | Ukrayna rəsmisindən Rusiyanın hücumu barədə mesaj

“Mən Ukrayna adından Azərbaycan dövlətinə və Azərbaycan xalqına bir daha dərin təşəkkürümüzü çatdırmaq istəyirəm. Genişmiqyaslı işğal, eləcə də təcavüzkara qarşı apardığımız bu 11 illik mübarizə zamanı Ukraynaya daimi humanitar dəstək verənlər arasında Azərbaycan da olub”.

Bunu Baku TV-yə açıqlamasında Ukrayna Baş nazirinin müavini Oleksiy Kuleba deyib.

Onun sözlərinə görə, bu dəstək indi o qədər güclüdür ki, buna görə təəssüf ki, Ukraynada Azərbaycan kapitalı olan infrastruktur obyektləri Rusiyanın atəşindən əziyyət çəkir:

“Mən dostlarımızı və tərəfdaşlarımızı əmin etmək istəyirəm ki, biz gələcəkdə bu obyektlərin bərpası və qorunması üçün əlimizdən gələni edəcəyik.

Çoxlu birgə layihələrimiz var. Ölkəmizin bərpasında Azərbaycan bizə kömək edir. Bizim Azərbaycan ilə Kiyev vilayətində sosial infrastrukturun bərpasına kömək edən gözəl layihələrimiz var. Bunlar eyni zamanda Ukraynanın şəhər və qəsəbələrində sosial strukturu yaxşılaşdırmağa yönəlib.

Təbii ki, istilik mövsümünün başlamasına az qalmış bizim üçün çox vacib olan birgə böyük enerji layihələrini və Azərbaycan tərəfinin dəstək paketini qeyd etməyə bilmərəm. Bu, dördüncü belə qış olacaq ki, bu ərəfədə istənilən kömək bizim üçün çox vacibdir. Əməkdaşlıqda qarşımızda duran vəzifələr son dərəcə yüksəkdir. Sizə bir daha təşəkkür edirəm”.