Ukraynalılar iki liderin görüşündən nə gözləyir? - Əsas istək və tələblər dilə gətirildi

Vaşinqtonda gözlənilən Ukrayna və ABŞ prezidentlərinin həlledici görüşü ciddi təlaş yaradıb.

Xüsusilə görüşqabağı ərazi güzəşti ilə bağlı açıqlamalar Ukrayna ictimaiyyətində qızğın müzakirələr və ciddi narahatlıq mövzusudur.

Ukrayna Baş nazirinin müavini Oleksiy Kuleba Baku TV-nin Şərqi Avropa bürosuna bildirib ki, ölkəsi bu görüşdən ancaq ədalətli sülh üçün qərar gözləyir, əks halda müharibə uzanacaq:

“Biz, şübhəsiz ki, bu dəhşətli müharibənin davam etdirilməməsi üçün Amerika tərəfinin həyata keçirdiyi bütün təşəbbüsləri yüksək qiymətləndiririk və təbii ki, növbəti həftələrdə qəbul ediləcək güclü qərarlar gözləyirik.

Mən bir daha vurğulayıram ki, məhz Ukraynada ədalətli sülh üçün qərarlar gözləyirik. Biz başqa istiqamətə yönələ bilmərik. Çünki Ukrayna üçün ədalətli sülh, ilk növbədə, sivil dünyanın qələbəsidir. Bu, Rusiyanın səbəbsiz və tamamilə əhəmiyyətsiz başlatdığı təcavüzün dayandırılmasıdır”.

Qeyd edək ki, avqustun 18-i görüş ərəfəsində Rusiya Ukraynanın bir neçə şəhərinə kütləvi hava zərbələri endirib.