"Laçın" postunda saxlanılan Xaçatryan üçün ermənilər narahatdır

Məlum olduğu kimi, iyulun 29-da Beynəlxalq Qızıl Xaç Komitəsinin vasitəçiliyi ilə müalicə almaq adı altında Ermənistana getmək istəyən Vaqif Xaçatryanı “Laçın” sərhəd-keçid məntəqəsində Azərbaycan sərhədçiləri saxlayıb. O, azərbaycanlılara qarşı soyqırımı, əhalini qanunsuz deportasiya etmə və ya məcburi köçürmədə ittiham olunur.

Əgər Avropa ölkələri və onların təsis etdikləri təşkilatlar ədalət axtarışında olsaydılar, təkcə terrorçu V.Xaçatryanın həbsinə görə hüquq və mənəvi dəyərlər qarşısında yanlış olduqlarını etiraf edərdilər. Amma onlar məhz öz ölkələrinin siyasi maraqları və şəxsi siyasi ambisiyalarına görə həqiqətləri deməkdən yayınırlar.

Terrorçu V.Xaçatryanın “Laçın” sərhəd-keçid məntəqəsində saxlanılması Azərbaycanın öz dövlət sərhədlərinə nəzarəti tam təmin etməsində nə qədər israrlı olduğunun təsdiqidir. Rəsmi məlumatlara görə, terrorçu Vaqif Xaçatryan bir qrup erməni hərbi birləşmələrinin tərkibində 1991-ci ilin dekabrın 22-də Xocalının Meşəli kəndində azərbaycanlılara qarşı kütləvi qırğın törədib. 25 azərbaycanlı öldürülüb, 14 nəfər yaralanıb, 358 nəfər isə didərgin salınıb.

Bundan əlavə, 1990-cı il martın 24-də qanunsuz erməni silahlı birləşmələri Ermənistan ərazisindən Qazaxın Bağanis-Ayrım kəndinə hücum edərək üçü qadın, biri 39 günlük körpə olmaqla 10 nəfəri xüsusi amansızlıqla qətlə yetirib. 2 şəxsə bədən xəsarətləri yetirilib, 12 yaşayış evi yandırılıb, 438 kənd sakini didərgin salınıb.

Azərbaycanın rəsmi məlumatına görə, Ermənistanın ölkəmizə qarşı törətdiyi cinayət hadisələri ilə bağlı ümumilikdə 76 cinayət işi başlanıb. Onların 39-u mülki əhaliyə qarşı törədilib. Həmin işlər üzrə 24 erməni beynəlxalq axtarışa verilib. Birinci Qarabağ müharibəsində, eləcə də atəşkəs dövründə Azərbaycan hərbçilərinə qarşı törədilən cinayətlərlə bağlı axtarışa verilənlərin sayı isə 300-ə yaxındır.