"Laçın" postundan Qızıl Xaça məxsus daha 9 avtomobil keçdi

Beynəlxalq Qızıl Xaç Komitəsi əməkdaşlarının müşayiəti ilə Xankəndi-Gorus istiqamətində “Laçın” sərhəd-buraxılış məntəqəsində erməniəsilli şəxslərin sərbəst keçidi növbəti dəfə təmin edilib.

“Report” xəbər verir ki, avqustun 15-də məntəqədən Xankəndi-Gorus istiqamətində Komitəyə məxsus ümumilikdə 9 nəqliyyat vasitəsi keçid edib. Nəqliyyat vasitələrinin içərisində 29 şəxs olub. Onlardan 6-sı BQXK-nin üzvü, 9-u sürücü, 9 nəfəri xəstə, 4 nəfəri müşayiətçi, 1 nəfəri isə tibb işçisidir. Həmin şəxslərin sənədləri yoxlanılıb və sərbəst hərəkətləri təmin edilib.

Bu, bir daha mülki ermənilərin sərhəd-buraxılış məntəqəsindən keçidinə heç bir maneənin, hər hansı çətinliyin olmamasını göstərir. Həmçinin Ermənistanın Azərbaycan tərəfindən Laçın yolunu blokadada saxlandığı iddialarının yalan və böhtan olduğunu növbəti dəfə sübut edir.