"Sülh" istəyən Ermənistanın sülhə zərbə vuran addımları

Təcavüzkar Ermənistanın Azərbaycana qarşı irəli sürdüyü əsassız iddiaları ilə başlanan keçmiş münaqişənin beynəlxalq hüquq normaları çərçivəsində, sülh anlaşması əsasında aradan qaldırılması ümumilikdə Cənubi Qafqaz xalqlarının milli maraqlarını özündə əks etdirir.

Lakin təəssüf ki, Azərbaycanın səy göstərdiyi sülh danışıqlarının nəticə verməsinə mane olan yalnız Ermənistanın təcavüzkar niyyəti deyil. Regionda böyük maraqları olan bəzi ölkələrin və beynəlxalq təşkilatların sərgilədikləri ikili standartlar işğalçı tərəfi və onun revanşist qüvvələrini daim qeyri-konstruktivliyə həvəsləndirib. Bütün bunlara baxmayaraq, sülh istiqamətində Azərbaycan öz mövqeyini qorumaqda qətiyyətlidir.

Prezident İlham Əliyev “Euronews” televiziyasına müsahibəsində deyib: “Sülh sazişinin əsas bəndləri nazirlər tərəfindən tərtib edilir. Bizim görüş isə hesab edirəm ki, yaxşı mühit yaradır. Lakin əgər biz Ermənistan tərəfindən konstruktiv yanaşma görsək və ən vacibi isə əgər onlar ərazi bütövlüyümüzü mübahisələndirən bütün iddialarını kənara qoysalar, onda biz tezliklə sülh variantını tapa bilərik”.

İki ölkə arasında münasibətlərin normallaşması üçün Ermənistan işğalçılıq niyyətindən əl çəkməlidir. Əslində, rəsmi İrəvan son proseslərdə Azərbaycanın ərazi bütövlüyünü tanıdığını, “Qarabağ Azərbaycandır” deməklə keçmiş münaqişənin bitdiyini bəyan edib. Bütün bunlar Avropa İttifaqı Şurasının Prezidenti Şarl Mişelin Brüsseldə Azərbaycan və Ermənistan liderlərinin görüşünün yekunlarına dair mətbuata açıqlamasında da əksini tapıb. Rəsmi Yerevan Qarabağdakı erməni separatçılarının “rəhbəri” Araik Arutyunyan, Samvel Babayan və onlar kimi digər terrorçuların dili ilə danışmağa, təxribat əməlllərinə nöqtə qoymalıdır.