"Telegram"dan əlinizi çəkin! | Markov Durovun həbsinə reaksiya bildirdi
“Telegram” sosial şəbəkəsinin yaradıcısı, milyarder Pavel Durovun şəxsi təyyarəsini tərk edərkən Fransa kəşfiyyat xidməti tərəfindən saxlanılması gündəm olub.
Fransa kütləvi informasiya vasitələrinin verdiyi məlumata görə, ölkə hakimiyyəti P.Durovun Kremllə qarşılıqlı əlaqəsini öyrənmək istəyir. Eyni zamanda rəsmi Paris milyarderdən onlarla əməkdaşlıq tələb edib.
İddia edilir ki, Rusiya rəsmiləri “Telegram”da rəsmi yazışmaların silinməsi barədə göstəriş alıblar.
Öz növbəsində amerikalı iş adamı İlon Mask məsələyə münasibət bildirib. O qeyd edib ki, “Instagram”da uşaq istismarı ilə bağlı böyük problem var, lakin Mark Zukerberq üçün həbs qərarı yoxdur, çünki o, hökumətlərə istifadəçi məlumatlarına arxa qapıdan giriş imkanı verir.
Məsələni Baku TV-yə şərh edən rusiyalı politoloq Sergey Markov isə bildirib ki, Pavel Durovun Fransada həbsi söz azadlığına ciddi zərbədir:
“Demokratiya və azadlığa düşmən olanlardan biri də Fransadır. Bu özünü Parisin kolonial, imperialist siyasətində də göstərir. Biz Pavel Durovun həbsinin əsas mahiyyətinin terrorizmlə mübarizə olmadığını yaxşı görürük.
Bu həbsin əsas mahiyyəti ABŞ-nin, Fransanın “Telegram” sosial şəbəkəsinə nəzarət mexanizmi tətbiq etməkdir. Məqsəd kim orada hansı yazışmaları həyata keçiribsə, həmin yazışmaların şifrələrini əldə etmək, daha sonra platformaya siyasi senzura tətbiq etməkdir. Əlbəttə, bu, neqativ tendensiyadır. Pavel Durova azadlıq! Fransa kəşfiyyat xidməti, “Telegram”dan əlinizi çəkin!”.
![icon](/images/loading.png)