Rəsmi Bakı daha bir məqsədinə nail oldu: Ağdam-Xankəndi yolu açılır

Rəsmi Bakı daha bir bəyan edilmiş strateji məqsədinə nail oldu. Ağdam-Xankəndi yolu açılır.

“Caliber”in əldə etdiyi məlumata görə, Rusiyadan yüklər Ağdamdan keçməklə Əsgərana, sabah isə son nöqtəyə çatdırılacaq. Beləliklə, bütün “imtinalara” və “qırmızı xətlər”ə baxmayaraq, qanunsuz rejim və onun himayədarları Ağdam marşrutunun alternativinin olmadığını anlayaraq bu reallıqla barışmağa məcbur oldular.

Laçın yolunun sabah açılacağı ilə bağlı yayılan xəbərlərə gəlincə, bu, həqiqətə uyğun deyil. Ümumiyyətlə, Laçın yolu yalnız Beynəlxalq Qızıl Xaç Komitəsi üçün açılacaq. Onlar da Azərbaycanın gömrük, sərhəd-keçid qaydalarına uyğun fəaliyyət göstərə biləcəklər.

“Ağdam yolunun açılması heç bir halda separatçılar üçün “indulgensiya” kimi yozula bilməz. Yəni separatçı rejimə hər hansı şans verilməyəcək. Ağdam yolunun fəaliyyət göstərməsindən asılı olmayaraq Azərbaycan ərazisində separatçı rejim formasında “boz zonalar”ın mövcudluğunun yolverilməzliyi məsələsi aktual olaraq qalır”, – deyə “Caliber”in məlumatında qeyd olunub.