Riskləri vaxtında aşkar etmək üçün... | Yeni iqlim strategiyası barədə açıqlama

Hazırda yeni iqlim strategiyasının hazırlanması istiqamətində işlər aparılır.

Bunu ekologiya və təbii sərvətlər naziri, COP29-un müəyyən edilmiş prezidenti Muxtar Babayev Ombudsmanların Beynəlxalq Bakı Konfransında deyib.

M.Babayev qeyd edib ki, Azərbaycanın iqlim strategiyası həm qlobal öhdəliklərə uyğunlaşmanı, həm də milli prioritetlərin icrasını özündə birləşdirir:

“Yeni strategiya bütün iqtisadi sektorları əhatə edərək aşağı karbonlu inkişafı hədəfləyəcək. Sənədi hazırlayarkən inklüzivlik və insan hüquqlarına xüsusi diqqət yetiririk. Ən həssas qrupların, o cümlədən uşaqlar, qadınlar və yerli əhalinin iqlim siyasətlərimizin mərkəzində olmasını təmin etmək üçün fəal tədbirlər görülür. Bunun üçün müxtəlif maraqlı tərəflər arasında görüşlər və müzakirələr təşkil olunur”.

O, həllini gözləyən ciddi çağırışların mövcudluğunu da diqqətə çatdırıb:

“Ən böyük çağırışlardan biri iqlim dəyişikliyinə uyğunlaşmaq üçün potensialın artırılmasıdır. Xüsusilə təmiz texnologiya və beynəlxalq iqlim maliyyəsi sistemlərinə çıxışın məhdudluğu yerli səviyyədə layihələrin həyata keçirilməsinə çətinlik yaradır”.