Rus jurnalist ermənilərin bütün etdiklərini aparıcının üzünə vurdu

Ermənistanda kifayət qədər populyar olan “Qlumov” tok-şousunun aparıcısı Yeqor Qlumov rusiyalı jurnalist Maksim Şevçenko ilə Qarabağı könüllü tərk edən ermənilərin həyatını müzakirə edib.

M.Şevçenko moderator tərəfindən verilən təxribat dolu suallara tarixi faktlarla cavab verərək onu susdurub.

Erməni jurnalistin guya “Azərbaycan tərəfi Qarabağdakı erməniləri sıxışdırıb” ifadəsinə də M.Şevçenko yerindəcə cavab verib:

“Azərbaycan hakimiyyəti ermənilərə nə təzyiq edib, nə də onları qovub. Rəsmi Bakı deyilənlərin əksinə olaraq onlara Qarabağda qalıb, yaşamaq hüququ verib, yəni Azərbaycan vətəndaşlığını qəbul edən hər kəs Qarabağda yaşaya bilər.

Kimsə getmək istəyənləri ayaqyalın, çılpaq, qarda, soyuqda başlarına silah dirəyərək qovmayıb. Halbuki 90-ci illərdə ermənilər Qarabağda azərbaycanlılara az şiddət və zülm verməyiblər. İnsanlara zülmdən danışırıqsa, niyə Xocalı soyqırımını yada salmırsınız? Bir milləti qırmaq belə tez unudula bilərmi?”.

Rusiyalı jurnalistin cavabına Yeqor Qlumov yersiz müdaxilə edərək biabırçı ifadə səsləndirib. O, Xocalıdan getmək istəyənlərə “biz dəhliz saxlamışdıq, gedərdilər” deməsi isə M.Şevçenkonu, sözün əsl mənasında, əsəbiləşdirib:

“Hansı dəhlizdən danışırsınız? Gülləbaran etdiyiniz, “buradan keçin” deyib, insanları yerindəcə amansızcasına öldürdüyünüz? Bu əməllərinizin adı etnik təmizləmədir və kimsə insanların yurdundan zorla çıxarılmasına, mədəniyyətinin dağıdılmasına, Füzulinin, Xocalının və digər rayonların bombalanmasına, azərbaycanlıların kütləvi qətlinə başqa ad verə bilməz. Bu, soyqırımıdır, bu, etnik təmizləmədir”.

Qeyd edək ki, əsl adı Qor Qriqoryan olan Yeqor Qlumov Ermənistanın tanınmış aparıcılarındandır.