Rusiya, Azərbaycan və Ermənistana bu dəfə bunu təklif etdi | Öhdəliyimiz var...

“Rusiya Azərbaycan və Ermənistan nümayəndələrinə danışıqlar üçün öz meydançasını təqdim etməyə və onlara maksimum rahat şərait yaratmağa hazırdır”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova iyulun 24-də keçirdiyi brifinqdə deyib.

“Rusiya hələ 2022-ci ildə regionda davamlı və uzunmüddətli sülhə nail olmaq məqsədilə ölkələr arasında sülh müqaviləsinin bağlanmasına fəal hazırlığın vacibliyini vurğulayıb və buna hər cür dəstək verməyə davam edəcəyini öhdəsinə götürüb. Yəni bizim yanaşmamız təkcə sabit deyil, həm də ölkəmizin imzası olan sənəddə qeyd olunub. Bu cür yardımın həcmi, forması danışıqlar aparan tərəflərin hər biri üçün məqbul və əldə edilmiş razılaşmalar çərçivəsində olmalıdır”, – o qeyd edib.

M.Zaxarova bildirib ki, Moskva dəfələrlə sülh müqaviləsi layihəsi üzrə Azərbaycan-Ermənistan danışıqlarının raundlarını qəbul edib:

“Bunu gələcəkdə də etməyə hazırıq. Moskva hər iki nümayəndə heyətinin işi üçün onlara məqbul olan ikitərəfli formatda maksimum rahat şəraitin yaradılmasına zəmanət verir. Müttəfiqlərimiz arasında balanslaşdırılmış sülh müqaviləsinin bağlanmasını regionda bölünməz təhlükəsizlik arxitekturasının və davamlı iqtisadi inkişafın qurulması üçün ilkin şərt hesab edirik.

Fikir ayrılıqlarının tezliklə aradan qaldırılacağına, ən yüksək səviyyədə ikitərəfli razılaşmalar çərçivəsində Azərbaycan-Ermənistan münasibətlərinin normallaşdırılmasının digər istiqamətlərində uğurlu irəliləyişin olacağına ümid edirik”.