Rusiya sülh müqaviləsindən niyə narahatdır?

Vaşinqtonda Azərbaycan və Ermənistan xarici işlər nazirləri arasında baş tutan görüş Rusiyanın yenidən narahatlığına səbəb olub. Bununla yanaşı, Moskvada da analoji görüşün keçiriləcəyinə dair Kreml tərəfindən anons verilib.

Rusiya Prezidentinin mətbuat katibi Dmitri Peskov isə bildirib ki, iki ölkə arasında mövcud problemlərin həlli və regionda gərginliyin azaldılmasına yönələn addımlar Rusiyanın iştirakı ilə imzalanan üçtərəfli sənədlər əsasında mümkündür. Bununla da Kreml Vaşinqtonda imzalana biləcək hər hansı sənədi şübhə altına aldığını, dolayısı ilə narahatlığını nümayiş etdirib.

Hazırda Rusiyanın başı Ukraynada hərbi əməliyyatlara qarışdığı üçün Cənubi Qafqazda istədiyi siyasəti həyata keçirə bilmir. Lakin görünür ki, şimal qonşumuz buna rəğmən regionla bağlı iddialarından da əl çəkmək fikrində deyil. Xüsusən də Moskvanın İrəvana təsir imkanları hələ də qaldığından bölgədə nüfuzunu qoruyub saxlamaq üçün Ermənistan vasitəsilə prosesə mane ola biləcəyini düşünür.

Rəsmi İrəvan sülh müqaviləsinə müəyyən maneələr törətsə də, vəziyyət Azərbaycanın xeyrinə işləyir. Deməli Ermənistanın danışıqlarda konstruktiv mövqe sərgiləmək və şərtləri qəbul etməkdən başqa yolu yoxdur. Çünki əksi bu ölkə üçün daha ağır nəticələrə səbəb ola bilər.