Rusiya və Azərbaycan prezidentləri Xəzər dənizi ilə bağlı mühüm razılığa gəldi

“Bizdən nə danışırlar?” verilişinin yeni buraxılışı yayımlanıb.

Verilişdə bildirilib ki, dünyada gedən proseslər, yeni münaqişə, müharibə ocaqlarının yaradılması və qonşu dövlətlərdə gərginliyin artdığı bir zamanda dünya siyasətində Azərbaycanın əhəmiyyətli rola malik olması danılmazdır. Çünki ölkəmizin sərgilədiyi mövqe baş verən geosiyasi proseslərdə vacib qərarların alınmasına təsir edir.

Rusiyanın “TASS” informasiya agentliyi oxucularının diqqətinə çatdırıb ki, Rusiya və Azərbaycan prezidentləri Xəzər dənizinin dayazlaşmasının qarşısını almaq üçün birgə işləmək barədə razılığa gəliblər.

Mənbə xəbər verib ki, bu barədə Rusiya Prezidenti Vladimir Putin gənc alimlərlə görüşündə danışıb.

“Bakıya səfər etdikdən sonra İlham Heydər oğlu ilə razılığa gəldik ki, bu mövzuda birgə işləyəcəyik. Mən artıq Rusiya Federasiyası Hökumətinə müvafiq fəaliyyət proqramının hazırlanması ilə bağlı tapşırıq vermişəm”, – deyə Rusiyanın dövlət başçısı bildirib.

Vladimir Putin qeyd edib ki, Xəzərin Aral dənizinin taleyini təkrarlamasına yol vermək olmaz və onun dayazlaşmasının qarşısını almaq üçün bütün tədbirlərin görülməsi vacibdir.

“The Caspian Post” xəbər verib ki, Azərbaycan və Səudiyyə Ərəbistanı arasında viza rejiminin ləğv edilməsi haqqında Saziş imzalanıb.

Bildirilib ki, “Azərbaycan Respublikası Hökuməti və Səudiyyə Ərəbistanı Krallığı Hökuməti arasında diplomatik, xüsusi və xidməti pasportlara malik şəxslər üçün qarşılıqlı viza tələblərinin qısa müddətə ləğv edilməsi haqqında Anlaşma Memorandumunun təsdiq edilməsi haqqında” Azərbaycan Respublikası Qanununun layihəsi – müddətli səfərlər” mövzusu parlamentin iclasının gündəliyinə salınıb.

Mənbə xəbər verir ki, Azərbaycan və Səudiyyə Ərəbistanı diplomatik, xüsusi və xidməti pasportlara malik şəxslərin qısamüddətli səfərlər üçün viza tələblərindən azad edilməsi barədə razılığa gəlib. Müzakirələrdən sonra qanun layihəsinin qəbul edildiyi qeyd olunub.

Qazaxıstanın “Kazinform” nəşri “Qazaxıstanla Azərbaycan arasında ticarət dövriyyəsi təxminən 40 faiz artıb” sərlövhəli məqalə dərc edib.

Bildirilib ki, Azərbaycanın Qazaxıstanla ticarət dövriyyəsi son 10 ay ərzində 393 milyon 831 min ABŞ dolları təşkil edib. Bu da bir il əvvələ nisbətən 38,7 faiz çoxdur.

Qeyd olunub ki, hesabat dövründə Azərbaycandan Qazaxıstana ixrac 23,2 faiz artaraq 107 milyon 747 min dollara, Qazaxıstandan Azərbaycana ixrac isə 45,6 faiz artaraq 286 milyon dollara çatıb.