Rusiya XİN anlayışları təhrif edir

Rusiya Xarici İşlər Nazirliyi 2024-cü il dekabrın 25-də AZAL-a məxsus təyyarənin qəzaya uğramasına görə sığorta ödənişlərinə həsr olunmuş geniş bəyanat yayıb.

"Caliber" layihəsinin "YouTube" kanalında yayımlanan yeni süjet bu mövzuya həsr olunub.

Süjetdə qeyd olunub ki, Rusiya XİN öz bəyanatında sığorta ödənişləri, milyardlarla və milyonlarla rubl köçürmələr barədə ətraflı məlumat verir.

"Amma eyni zamanda onlar əsas məsələ – Azərbaycanın tələb etdiyi təzminat və təqsirkarların cəzalandırılması barədə susurlar. Məhz burada anlayışlar qəsdən təhrif olunur", – deyə "Caliber"in videomaterialında qeyd olunur.

Qeyd edək ki, Rusiya Xarici İşlər Nazirliyi 2024-cü il dekabrın 25-də Qazaxıstanın Aktau şəhəri yaxınlığında qəzaya uğrayan "Azərbaycan Hava Yolları" QSC-nin təyyarəsinin xəsarət almış sərnişinlərinə və həlak olanların yaxınlarına ümumilikdə 358,4 milyon rubl məbləğində sığorta ödənişi edildiyini bildirmişdi.