Rusiyada Azərbaycandakı seçkilər və Qarabağ barədə süjet yayımlandı

Rusiyanın “Birinci kanal”ında fevralın 7-si Azərbaycanda keçiriləcək növbədənkənar prezident seçkiləri barədə geniş reportaj yayımlanıb.

Süjetdə seçki məntəqələrinin səsverməyə hazır olduğu bildirilib. Xüsusi vurğulanıb ki, bu il ilk dəfə seçkilər Qarabağ da daxil olmaqla, Azərbaycanın bütün ərazilərində baş tutacaq.

Bildirilib ki, Prezident İlham Əliyev də daxil olmaqla prezidentliyə namizədliyi qeydə alınan şəxslərin sayı 7 nəfərdir.

İşğaldan azad edilən Qarabağda çəkiliş edən jurnalist ermənilərin 30 il öncə törətdikləri cinayətlərdən də danışıb. Süjetdə daha sonra Qarabağda, o cümlədən Zəngilanın Ağalı kəndində aparılan yenidənqurma-bərpa işlərindən, seçki məntəqələrinin texniki təchizatından da söhbət açılıb.

Əlavə olunub ki, Ağalı Qarabağın ilk ağıllı kəndi hesab olunur. İnsanların rahat yaşayışı üçün ölkə rəhbərliyi hər cür şərait qurub. Bildirilib ki, təkcə Ağalı kəndində 985 seçici qeydə alınıb.

Sonda qeyd olunub ki, həmişə insidentsiz və problemsiz keçirilən prezident seçkilərinin bu il də eyni qaydada baş tutacağı gözlənilir.