Rusiyada dezinformasiyalar üzrə mühüm tədbir | Azərbaycanı "Global Media Group" təmsil etdi

Moskvada dezinformasiyanın yayılması və millətlərarası münaqişələrin qarşısının alınması istiqamətində növbəti çoxtərəfli görüş baş tutub.

“Saxtakarlığa qarşı dialoq” beynəlxalq forumunun əsas mövzuları da elə həqiqəti əks etdirməyən məlumatların yayılmasının qarşısının alınması olub.

Tədbirdə 65 ölkədən, o cümlədən ABŞ, Avstraliya, Çin, Fransa, İspaniya, İtaliya, Niderland, İsveçrə, Avstriya, Böyük Britaniya, Almaniya, Hindistan, Türkiyə və s. dövlətlərin nümayəndələri, iş adamları, jurnalistlər həmçinin dünyanın hər yerindən 1000-dən çox beynəlxalq ekspert iştirak edib.

Sessiyalarda çıxış edənlər arasında Avstriyanın keçmiş xarici işlər naziri Karin Knaysl, irlandiyalı jurnalist Çey Bouz və Co Baydenin sabiq köməkçisi Tara Ridin də olub.

Azərbaycanı isə bu beynəlxalq forumda “Global Media Group”un nümayəndələri təmsil ediblər.

Baku TV-nin rusdilli departamentinin baş redaktoru Natella Osmanlı “Millətlərarası münaqişələrin qarşısının alınmasına dair” sessiyada çıxış edib.

“Feyk, saxta və dezinformasiya məsələlərindən danışarkən Sovetlər Birliyinin dağılmasına səbəb olan amilə, Azərbaycanın tərkib hissəsi olan Qarabağdakı hadisələrə toxunmasaq olmaz. Ölkələrarası gərginliklərin özəyi elə bu sözügedən feyklərdir. Bütün hadisələr Qərbin xüsusi xidmət orqanlarının havadarlığı ilə baş verirdi. Biz bunu indilərdə anlamağa başladıq.

Onlar bununla yeni erməni ideologiyası yaradaraq Azərbaycana ərazi iddiaları ilə müşayiət olunan hadisələrə rəvac verdilər və bütün bu hadisələr torpaqlarımızın 30 illik əsarəti, insan tələfatı və silahlı toqquşmalara gətirib çıxardı”, – deyə o diqqətə çatdırıb.