Rusiyadan Paşinyana sərt cavab: Paşinyan isə Moskvanı günahlandırır

“Ermənistanın Baş naziri Nikol Paşinyan daxili və xarici siyasətdəki uğursuzluqlara görə məsuliyyətdən yayınmaq, günahı Moskvanın üzərinə atmaq istəyir”.

Bu barədə Rusiya Xarici İşlər Nazirliyinin bəyanatında deyilir.

Nazirlikdən bildirilib ki, Paşinyanın sentyabrın 24-dəki çıxışı zamanı səsləndirdiyi fikirlər özündə Rusiyaya qarşı qəbuledilməz hücumları ehtiva edir: “Regional məsələlərə gəlincə isə Rusiya, Azərbaycan və Ermənistan liderlərinin 2020-ci ilin noyabrında əldə olunmuş razılaşmaya əməl etmək əvəzinə, Paşinyan Qərbin öyüd-nəsihətlərinə boyun əydi”.

Rusiya Xaric İşlər Nazirliyi onu da əlavə edib ki, Paşinyanın komandasının bu məsuliyyətsiz yanaşması erməni cəmiyyətinin bir hissəsində anlaşılan narazılığa səbəb olub və bu narazılıq xalqın etirazlarında ifadə olunub:

“Ermənistanda baş verən etirazların Rusiya tərəfindən təşkil olunması ilə bağlı iddialar yalandır. Moskva “rəngli inqilablar” təşkil etməkdə kifayət qədər mahir olan Qərbdən fərqli olaraq, belə işlərlə məşğul olmur. Hakimiyyətin təhriki altında erməni mətbuatında əsl anti-Rusiya kampaniyası aparılır”, – deyə bəyanatda vurğulanıb.