Rusiyadan üz döndərmək Ermənistana baha başa gələcək

“Caliber”in etibarlı mənbələrdən əldə etdiyi məlumata görə, Amerika Birləşmiş Ştatları və Ermənistan arasında təhlükəsizlik razılaşması əldə edilib.

Razılaşmaya əsasən, Ermənistana mümkün təzyiq və ya embarqo fonunda Vaşinqton İrəvana ən yüksək formada dəstək verəcək. Təsadüfi deyil ki, bu anlaşmadan əvvəl Fransa da analoji addım ataraq Ermənistanı silahlandırıb.

Maraqlıdır ki, son günlər Qərb cəbhəsinin Ermənistana davamlı dəstəyi nəyin götəricisidir?

Millət vəkili Hikmət Məmmədov bildirib ki, bu faktorun gələcəkdə regionda təhlükəsizliyi təhdid edəcəyi bəllidir:

“Əgər səsləndirilən məsələlər reallaşdırılarsa, Cənubi Qafqazda yeni bir qarşıdurma mərhələsinə qədəm qoyacağıq. Bu qarşıdurmanın əsas tərəfləri Rusiya-ABŞ, eyni zamanda həm də Azərbaycan və Ermənistan olacaq”.

Qeyd etmək yerinə düşər ki, artıq sosial şəbəkələrin erməni seqmentində də müharibə anonsları verilir. Ermənistanın yaxın günlərdə Azərbaycana hücum edəcəyi ilə bağlı müzakirələr aparılır.

Deməli, Birləşmiş Ştatların və Fransanın Ermənistanın təhlükəsizliyinə zəmanət verməsi və silahlandırması əbəs yerə deyil. Bütün bunların fonunda isə Ermənistanın Azərbaycana hücum planı ehtimaldan daha çox real görünür.

Təbii ki, istənilən münaqişə nə Azərbaycanın, nə Ermənistanın, nə də regionun maraqlarına uyğundur. Bu faktor bölgədə sülh danışıqlarına və sabitliyə kölgə salır. Bütün məsuliyyət isə Ermənistanla havadarlarının üzərinə düşür.