Rusiyalı politoloq Bakı-Moskva münasibətlərindən danışdı

Rusiya sülhməramlı kontingentinin vaxtından əvvəl Azərbaycanın Qarabağ bölgəsindən çıxarılması iki ölkə arasındakı münasibətlərin möhkəmliyinə işarədir.

Bu fikirləri “NEWS.ru”ya müsahibəsində politoloq, Rusiya Beynəlxalq Əlaqələr Şurasının eksperti Aleksey Naumov deyib.

Onun sözlərinə görə, Bakı ilə Moskva arasındakı münasibətlər sınaqlardan uğurla çıxıb.

“Moskva ilə Bakı arasındakı münasibətlər bu çətin dövrdə öz gücünü və faydalı olduğunu göstərdi. Sülhməramlıların vaxtından əvvəl çıxarılması müstəsna olaraq Rusiya ilə Azərbaycan arasında olan mehriban qonşuluq münasibətləri çərçivəsində baş tutub. Bu münasibətlər Ermənistanın get-gedə Avropaya üz tutması fonunda daha vacib məsələdir.

Məsələ bundadır ki, Azərbaycan Ermənistandan fərqli olaraq özünü etibarlı, proqnozlaşdırıla bilən və dürüst tərəfdaş kimi göstərdi. Prezident İlham Əliyev isə işini bilən, danışıqlar aparmağı bacaran siyasətçi kimi bir daha özünü təsdiqlədi. Azərbaycan və Rusiya arasında müttəfiqlik qarşılıqlı fəaliyyəti haqqında Bəyannamə İrəvanın Kremlin xarici siyasətində təkcə formal deyil, həm də faktiki olaraq imtiyazlı mövqeyinə son qoydu. Bu, təkcə Ermənistan hakimiyyətinin uğursuz siyasəti ilə deyil, həm də Azərbaycanın layiqli və nəcib davranışı ilə bağlıdır”, – o bildirib.

Qeyd edək ki, Prezident İlham Əliyev Rusiya Prezidenti Vladimir Putinin dəvəti ilə Rusiyaya rəsmi işgüzar səfərə gedib.