Rusiyalı politoloq Laçındakı təxribata münasibət bildirdi

“Ermənistan silahlı birləşmələrinin “Laçın” sərhəd-buraxılış məntəqəsi yaxınlığında, Həkəri çayı üzərindəki körpüdə Azərbaycan bayrağının qaldırılmasına qeyri-adekvat mövqe sərgiləyərək silahlı təxribata əl atması Qərbin işi ola bilər”, – Rusiyalı politoloq Sergey Markov bu fikirdədir.

O, ermənilərin bu təxribatını üçüncü ölkənin sifarişi kimi qiymətləndirib.

“Yüksək ehtimalla demək olar ki, ABŞ Nikol Paşinyandan həm Azərbaycan Ordusuna, həm də Rusiya sülhməramlılarına qarşı Laçında təxribat törətmələrini istəyib. Azərbaycan Ordusu bayraq qaldırdığı zaman sözügedən ərazidə atışma olub.

Rusiya mətbuatı diplomatik mənbələrə istinadən yazır ki, ABŞ Qarabağ məsələsinə girişməyə çalışır və eyni zamanda bölgədəki erməni sakinlərin Bakı ilə danışıqlar aparmasını istəyir. Bu hal Paşinyana xidmət edən erməni mediasını hiddətləndirib və onlar təxribatın kadrlarını yayıblar.

Qərb və Avropa Rusiyanı sülhməramlı vasitəçi kimi regiondan sıxışdırmaq niyyətindədir. Buna görə də bu təxribatlar Paşinyanın ABŞ, Avropa və güman ki, Fransa ilə planlaşdırılmış ssenarisi əsasında baş verir”, – deyə politoloq bildirib.

Qeyd edək ki, Ermənistan Silahlı Qüvvələrinin “Laçın” sərhəd buraxılış məntəqəsi ərazisində törətdiyi təxribat zamanı Dövlət Sərhəd Xidmətinin hərbi qulluqçusu yaralanıb. Ordumuzun gördüyü cavab tədbirləri nəticəsində qarşı tərəfin iki snayperi zərərsizləşdirilib.