Rusiyaya qarşı plan | İran dəhlizə Ermənistanın nəzarət etməsini buna görə istədi

Zəngəzur dəhlizi ilə bağlı məsələdə İran və ABŞ-nin maraqları üst-üstə düşür.

Bu sözləri Beyrutda nəşr olunan “Azdak” qəzetinin baş redaktoru Şaan Qantaxaryan erməni mediasına açıqlamasında deyib.

O bildirib ki, Qərb bu yolun Rusiyanın nəzarətinə keçməsini istəmir, İran da yola yalnız Ermənistanın nəzarət etməsinə çalışır ki, “xarici dünyaya çıxışı” etibarlı olsun:

“Bu məsələdə geosiyasi mərkəzlər arasında konsensus yoxdur, ona görə də kommunikasiya qapalı qalmaqda davam edir. Bunda təkcə Ermənistanın imtinası rol oynamır”.

Ş.Qantaxaryanın iddiasına görə, İranın Zəngəzur dəhlizi məsələsində qəti ritorikası Ermənistanın Zəngəzur bölgəsinin Fars körfəzi ilə Qara dəniz arasında Ermənistan, Gürcüstan və əks istiqamətdə əlaqəni təmin etmək üçün ən etibarlı məntəqə olması ilə bağlıdır:

“İran və ABŞ-nin bu xəttin açılması məsələsində razılığa gəldiyini düşünmək üçün əsaslar var. Bunu infrastruktur işləri, eləcə də İranın Ermənistanda xaricdə ən böyük daimi ticarət mərkəzi açmaq planları sübut edir. Bütün bunlar İran üçün Rusiyanın maraqlarına əsaslanmayan yeni kommunikasiyaların formalaşmasından xəbər verir. Tehran və Moskva arasında son bəyanatlar bununla bağlıdır”.