Sahibə Qafarova Milli Məclisdə Heydər Əliyevdən danışdı

Milli Məclisin sədri Sahibə Qafarova ümummilli lider Heydər Əliyevin 100 illik yubileyinə həsr olunmuş xüsusi iclasda çıxış edib.

Spiker qeyd edib ki, həqiqi milli liderlərin əməllərinin və ideyalarının sönməz nuru həm sağlığında, həm də dünyasını dəyişəndən sonra mənsub olduqları xalqın həyatına və tale yoluna işıq salır.

“Azərbaycanın öz tarixi ərzində yetişdirdiyi ən böyük siyasi və dövlət xadimlərindən biri olan Heydər Əliyevin keçdiyi ömür yolu doğma torpağa, xalqa məhəbbət və sədaqət meyarına çevrilmiş, fəaliyyəti dünya siyasət sənəti xəzinəsinə daxil olmuşdur. Onun sayəsində xalqımız əvvəlcə siyasi və dövlət müstəqilliyinin möhkəm təməlini yaratmış, daha sonra isə müstəqil dövlətini qurmaq, qorumaq və yaşatmaq üçün tarixin verdiyi imkanı reallaşdıra bilmişdir”, – deyə S.Qafarova əlavə edib.