Sarkisyandan Paşinyana sərt cavab

“Ermənistanın indiki hakimiyyətinin gücü onun həyasızlığındadır”.

Bunu Ermənistanın sabiq prezidenti Serj Sarkisyan Baş nazir Nikol Paşinyanın özündən əvvəlki hakimiyyətin ölkəni müdafiə etmək üçün kifayət qədər silah-sursat almaması barədə ittihamına cavab olaraq deyib.

“Əlbəttə, bu, açıq-aşkar yalandır və deməliyəm ki, Ermənistanın indiki hakimiyyətinin gücü onun həyasızlığındadır. Onlar başqasının gözünün içinə baxa və utanmadan yalan danışa bilərlər. Döyüş hazırlığı istiqamətində biz Ermənistan Respublikasının hazırkı hökumətinin bu iki ildə əldə etdiyi silah-sursatdan çox xərcləmişik. Onlar nə alıblar? Heç bir faydası olmayan üç təyyarə, dəyərini itirmiş onlarla köhnə "Osa-AKM"? Daha nələr? Qoy desinlər”, - deyə o bildirib.

Eks-prezidentin sözlərinə görə, o zaman yüzlərlə müasir hava hücumundan müdafiə sistemi, on minlərlə iriçaplı sursat alınıb. Keçmiş dövlət başçısı əlavə edib ki, yalnız bir odlu silah 100 milyon dollardan artıq qiymətə alınıb.