Səfirliklərdən Azərbaycana başsağlığı

ABŞ-nin Azərbaycandakı səfirliyi Tehranda baş verən hadisəyə kədərləndiklərini açıqlayıb.

Bu barədə səfirliyin “Twitter” hesabında yazılıb: “Səfirlik Azərbaycan Xarici İşlər Nazirliyində çalışan həmkarlarına və onların ailə üzvlərinə Azərbaycanın Tehrandakı səfirliyində baş verən faciəvi insidentlə bağlı dərin kədərini bildirir. İnsident zamanı həyatını itirən Orxan Əsgərovun ailəsinə başsağlığı verir və yaralananlara şəfa diləyirik”.

Türkiyə səfirliyi də Azərbaycanın İrandakı səfirliyinə hücumla bağlı başsağlığı verib. Səfir Cahit Bağçı bununla bağlı “Twitter“də paylaşım edib.

“Azərbaycanın İrandakı səfirliyinə silahlı hücum xəbəri məni sarsıtdı”. Bunu isə Böyük Britaniyanın Azərbaycandakı səfiri Fergus Auld tviterdə yazıb. “Qətlə yetirilən şəxsin ailəsinə başsağlığı verir, yaralılara şəfa diləyirəm”, - deyə Auld bildirib.

Almaniyanın Azərbaycandakı səfiri Ralf Horlemann da hücumla bağlı paylaşım edib. “Biz Azərbaycanın İrandakı səfirliyinə edilən hücum xəbərindən sarsıldıq və hər cür zorakılığı pisləyirik”, - deyə səfir bildirib.