İsrail Ordusu yenidən hücuma keçdi

İsrail Hərbi Hava Qüvvələri İranın paytaxtına yeni hücum dalğasını həyata keçirib.

Bu barədə İsrail Ordusunun Mətbuat Xidməti məlumat yayıb.

Bildirilir ki, hücumlar Tehrandakı hərbi sənaye komplekslərini və obyektləri hədəf alıb. Əməliyyatda 150-dən çox qırıcı təyyarə iştirak edib və 120-dən çox sursatdan istifadə edilib.

İsrail ballistik raketlərin istehsal olunduğunu və saxlanıldığını iddia etdiyi obyektləri də vurub. Hücumdan sonra İranda elektrik enerjisinin kəsintiləri barədə məlumatlar yayılıb.

"Fars" xəbər agentliyinin məlumatına görə, Kərəc şəhərində, eləcə də İran paytaxtının bir neçə rayonunda elektrik enerjisinin kəsintiləri qeydə alınıb.

Qeyd olunub ki, İsrail Ordusu İranın mərkəzi və qərbindəki hədəflərə 140 hava hücumu həyata keçirib. Hərbçilərin məlumatlarına görə, hədəflər arasında hava hücumundan müdafiə sistemləri ilə əlaqəli obyektlər də olub.

Həmçinin İsfahan Texnologiya Universiteti ABŞ və İsrailin hücumlarına məruz qalıb. Məlumata görə, hücum nəticəsində universitetin bir neçə binasına ziyan dəyib, azı dörd işçi yaralanıb. Qeyd olunur ki, bu, eskalasiya başlayandan bəri universitetə edilən sayca ikinci hücumdur.