Separatçılar Bakıya müsahibə verəcək | Ermənilər qorxuya düşdü

Ermənistanda Bakıda həbsdə olan separatçıların dövlət televiziyasında yayımlanacaq müsahibələri ilə bağlı müzakirələr davam edir. Martın 28-də efirə gedəcək sənədli filmdə Araik Arutyunyanın danışacağı gözlənilir, o cümlədən digər separatçıların da danışacağının anonsu verilib.

Ermənistan mediası Araikin müharibə haqda sirləri açacağını və bu etirafların rəsmi İrəvanı çətin vəziyyətə salacağını yazır.

Erməni şərhçi Edik Andreasyanın iddiaları bu kontekstdə xüsusilə diqqət çəkir. Onun fikrincə, separatçıların etirafları Ermənistanın işğalçı kimi məsuliyyət daşımasına dair faktlar yarada bilər və Azərbaycanın bundan istifadə edəcəyi gözləniləndir.

“Maraqlıdır ki, bu müsahibələr hara hesablanıb: Azərbaycan cəmiyyətinə, yoxsa erməni ictimai rəyinə. O da maraqlıdır ki, onlar müsahibəni hansı dildə verəcəklər. Nikol Paşinyan isə bu haqda susur. Görünür o, qeyri-müəyyənlik içində ilişib qalıb”, – erməni şərhçi qeyd edib.

E.Andreasyan hesab edir ki, Araik və digər separatçıların Azərbaycan televiziyasına çıxmasının siyasi nəticələri də olacaq.

“İstisna deyil ki, Bakı İrəvan qarşısına tələb qoyub: Paşinyan ya qalan 8 kəndi verib sülh müqaviləsini imzalamalıdır, ya da Araik və digərləri bildiklər sirləri açacaq və bu sirlər bütün dünyaya yayılacaq”, – erməni şərhçi iddia edib.