“Separatçılar toplaşır, Ermənistan isə...” | Moskvanın məxfi tapşırığı ifşa olundu?

Qarabağdan Ermənistana qaçan separatçıların qalıqları əvvəllər Paşinyan hakimiyyəti tərəfindən hücumlara məruz qalsa da, son dövrlər bu təzyiqlərin səngidiyi müşahidə edilir. Hətta İrəvandakı qondarma artsax nümayəndəliyi fəaliyyətinə hələ də davam edir, separatçılar da əsas toplantılarını orada keçirirlər.

“Hraparak” nəşri Ermənistan hakimiyyətinin separatçılara loyal münasibətinin səbəblərini öyrənib.

Nəşr yazır ki, hakimiyyət əvvəllər “dövlət içində dövlətin olmasına” dözməyəcəyini desə də, son aylar qeyri-adi dərəcədə loyallıq nümayiş etdirir.

“Hakimiyyət prezident və parlament institutlarını qoruyub saxlamağa imkan verən konstitusiya dəyişikliyində də, Samvel Şahramanyanın qondarma “artsaxın” buraxılması qərarını dəyişəndə də reaksiya vermir. Mənbələrimiz bildirir ki, Ermənistan hakimiyyətinin bu loyallığı Rusiyadan aldıqları xəbərdarlıqla bağlıdır.

Məlumata görə, Rusiya Ermənistan hakimiyyətindən “artsax” qurumlarının ən azı formal olaraq saxlanılmasını, ümumiliyyətlə, “artsax” məsələsinin tamamilə bağlanmamasını istəyib”, ‒ nəşr iddia edir.