Separatçıların həbsi həm də beynəlxalq hüququn tələbidir

Azərbaycan Ordusunun keçirdiyi 23 saatlıq lokal xarakterli antiterror tədbirləri Qarabağ separatçılarının ağ bayraq qaldırıb təslim olması ilə bitdi.

Bununla da 32 illik qondarma rejimin mövcudluğuna tamamilə son qoyuldu. Növbəti mərhələ isə əli soydaşlarımızın qanına bulaşan digər canilərin saxlanılması ilə nəticələndi. Lakin onların hərbi cinayətkar olması hansı formada cəza alacaqları barədə də suallar yaradır.

Yəni terrorçular beynəlxalq hərbi tribunalda cəzalanmalıdır, yoxsa yerli qanunvericiliyə uyğun şəkildə?

Çingiz Qənizadə bildirib ki, bu şəxslər mülki əhaliyə qarşı silahdan istifadə edilməsi qaydalarını pozmaqla beynəlxalq hüququ pozublar, amma Azərbaycan Beynəlxalq Cinayət Məhkəməsinin üzvü deyil: “Bu baxımdan onların hər biri Azərbaycan qanunları ilə cəzalandırılacaq. Çox güman ki, onlar barəsində ömürlük azadlıqdan məhrum edilmə cəzası çıxarılacaq”.

Məlumdur ki, sözügedən şəxslər həm də bəşəri cinayətlərə imza atıblar. Bu baxımdan onların həbsi həm də beynəlxalq hüququn tələbidir. Azərbaycan necə ki beynəlxalq hüquqdan irəli gələn hüququnu öz gücü ilə əldə edib, deməli, bu məsələdə istənilən addımı atmaq haqqına da sahibdir və kimsə buna görə rəsmi Bakıya irad tuta bilməz.