Sergey Markov fransızların Makrona nifrətindən danışdı

Fransa Prezidenti Emmanuel Makron canlı yayımda qeyri-adi hərəkəti ilə növbəti dəfə medianın gündəminə gəlib.

Dövlət başçısı bahalı saatını tamaşaçılardan gizlətmək üçün masanın altında onu çıxarıb. E.Makronun bu hərəkəti fransızların gözündən yayınmayıb və sosial şəbəkələrdə geniş müzakirələrə səbəb olub. Fransa cəmiyyəti prezidenti daş-qalaq edərək qınayıblar.

Rusiyalı politoloq Sergey Markov deyib ki, E.Makronun hərəkəti onun xalqın yanında olmadığının göstəricisidir: “Fransa Prezidentinin canlı yayımda 80 min avroluq bahalı saatını masanın altında gizli şəkildə çıxarması fransızları ciddi qəzəbləndirib. Əlbəttə bu, xalqda nifrət yaradır. E.Makron açıq-aydın göstərir ki, xalqın deyil, bankirlərin tərəfindədir. Ona hamı gülür və bilirlər ki, yalançıdır. Bu gün Fransa dünyanın istənilən yerində sülh üçün töhfə verəcək vəziyyətdə deyil”.

Məsələyə Yelisey sarayından da münasibət bildirilib. E.Makronun texniki səbəbə görə saatı çıxardığı qeyd olunub.