Sülh müqaviləsinin neçə bəndi razılaşdırılıb? | Ekspertlərdən vacib açıqlama

Ermənistanda hakimiyyət nümayəndələri hesab edirlər ki, Azərbaycan-Ermənistan arasında sülh müqaviləsinin əsas hissəsi razılaşdırılıb və razılaşdırılan bəndlər əsasında müqavilə imzalana bilər. Hətta İrəvan rəsmiləri buna dair xüsusi rəqəmlər də səsləndirirlər.

Ermənistan Baş naziri Nikol Paşinyan bildirir ki, sülh müqaviləsinin 17 bəndindən yalnız 3-ü razılaşdırılmamış qalır, elə həmin ölkənin xarici işlər naziri Ararat Mirzoyan isə media nümayəndələrinin suallarını cavablandırarkən qeyd edir ki, müqavilənin 16 bəndindən yalnız 3-ü tam razılaşdırılmayıb.

Bu, ermənisayağı hesablamanın növbəti təzahürüdür, bir ölkənin iki ayrı rəsmisi ziddiyyətli rəqəmlər səsləndirir.

Siyasi elmlər doktoru Elman Nəsirovun sözlərinə görə, Ermənistan sülhə hazır deyil və vaxtı uzatmaqla məşğuldur:

“ATƏT-in Minsk qrupu kimə lazımdır? Bu qrumun təmsilçiləri bir-biri ilə müharibə vəziyyətindədir. Bəs onda niyə ATƏT-in Minsk qrupundan imtina ilə bağlı Azərbaycanın təşəbbüsünü Ermənistan müdafiə etmir? Ermənistanda bu gün revanşizm tüğyan edir. Bəs niyə sülhdən danışan dövlət revanşizmin qarşısını almaq üçün heç bir addım atmır? Bütün bu reallıqların fonunda hesab edirəm ki, Ermənistanın siyasi rəhbərliyinin səsləndirdiyi rəqəmlər ikiüzlülükdən başqa bir şey deyil”.