Sülh olmadan Zəngəzur dəhlizinin açılması mümkündür? | Ekspertlərdən açıqlama

Qlobal miqyasda mühüm əhəmiyyət kəsb edən Zəngəzur dəhlizinin nə zaman açılacağı və ona kimin nəzarət edəcəyi hələ də açıq qalan suallardandır.

Əgər Ermənistan bu koridorun açılmasına ciddi maneə yaradarsa, Azərbaycan hansı addımları atacaq?

Siyasi elmlər doktoru Elman Nəsirovun sözlərinə görə, bu məsələdə uduzan tərəf Ermənistan olacaq:

“Hesab edirəm ki, Ermənistan tərəfi onun fərqində olmalıdır ki, Azərbaycanın alternativi var. Əgər Zəngəzur dəhlizinin işə düşməsinə mane olarsa, belə olan vəziyyətdə Azərbaycan digər yolla, İrandan keçməklə eyni niyyətini həyata keçirəcək və uduzan tərəf məhz Ermənistan olacaq”.

Qərbin regiona müdaxiləsi və Ermənistanın sülh sazişini sabotaj etmək cəhdləri kommunikasiyaların açılmasına ciddi əngəl yaradır. Bəs sülh sazişi imzalanmadan öncə Zəngəzur dəhlizinin açılması mümkündürmü?

“Zəngəzur dəhlizinin sülh sazişi imzalanmadan açılması nəzəri cəhətdən mümkündür, amma texniki baxımdan sürətli dəmir yolu açılışı, məncə, mümkün deyil. Çünki Ermənistan tərəfi orada lazımi işləri aparmır, ya da o işləri ləng görür”, – deyə siyasi elmlər doktoru Nazim Cəfərsoy bildirib.

Ekspertlər bildirirlər ki, əslində, Zəngəzur dəhlizi açılacaq, sadəcə bu kimi süni maneələr zamanın uzanmasına səbəb olur. Qeyd olunub ki, daha öncə həll olunacaq məsələlərin fonunda ona nəzarət məsələsi çox sonranın işidir.