Sülh prosesinə təkan verən məqamlar | Müqavilə ilin sonuna kimi imzalana bilər?

Kazan görüşü Azərbaycan və Ermənistan üçün nəticəyönümlü olub.

Belə ki, tərəflər arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın birgə fəaliyyəti haqqında bir müddət əvvəl imzalanan Əsasnamə Azərbaycan Prezidenti İlham Əliyev və Ermənistan Prezidenti Vaaqn Xaçaturyan tərəfindən ayrılıqda təsdiqlənib.

Qeyd etmək lazımdır ki, Kazanda tərəflər arasında ilk dəfə olaraq geniş tərkibdə görüş keçirilib. İki ölkə arasında münasibətlərin normallaşması üzrə fəaliyyət göstərən bütün məsul şəxslər bu görüşdə iştirak ediblər. Siyasi şərhçilər bildirirlər ki, bu da öz növbəsində görüşün effektivliyini artıra bilər.

Siyasi şərhçi Oqtay Qasımovun sözlərinə görə, bundan sonra sərhədlərin delimitasiya və demarkasiyası ilə bağlı proses daha da intensiv xarakter alacaq:

“Onun hansı ərazilərdə aparılması komissiyanın qərarından asılı olacaq. Yəni Kəlbəcər, Basarkeçər, Zəngəzur ərazisində, o cümlədən Naxçıvanın Ermənistanla sərhədlərində bu delimitasiya prosesləri həyata keçirilə bilər. Düşünürəm ki, komissiyalar çox güman ki, daha az problemin olduğu, hər hansısa mübahisə yaratmayacaq ərazilərdə bu prosesi daha sürətli həyata keçirməyə çalışacaqlar”.