Sülhə mane olan Ermənistanın arzusu ürəyində qaldı

İyunun 15-i səhər saatlarında “Laçın” sərhəd-buraxılış məntəqəsində törədilən təxribat bir hərbçimizin yaralanması ilə nəticələndi.

Ermənistan tərəfi isə etdikləri azmış kimi Azərbaycanın sərhədi pozaraq, bayraq sancmağa cəhd etməsi kimi cəfəng iddialar irəli sürdü. Amma ortaya çıxan xəritə görüntüləri və dəqiq koordinatlar onların bu yalanını ifşa etdi. İllərdir təcavüzkar siyasət yürüdən Ermənistan tərəfi, deyəsən, yenə məsələnin mahiyyətini başqa yönə çəkməyə çalışır. Rəsmi Bakı isə bəyan edir ki, Azərbaycan öz suveren ərazisində bayraq qaldırıb və buna tam hüququ var.

Görünən odur ki, Ermənistan yaydığı əsassız iddialarla həmişəki kimi məsuliyyəti öz boynundan atmağa çalışır. Tarixən öyrəşdiyimiz əməllərindən hələ də əl çəkə bilməyən rəsmi İrəvan bu addımları ilə delimitasiya və demarkasiya proseslərini ləngitmək, sərhədi pozmaq və sülh müqaviləsinin imzalanmasına mane olmağa çalışır.

Separatçı ünsürlərin Qarabağdakı mövcudluğu sülh danışıqları prosesini zədələməklə bərabər, həm də 10 noyabr bəyanatına ziddir. Bir yandan Avropanın vasitəçiliyi ilə silah tədürük edən, həmçinin yeni mühəndis istehkam qurğuları yaradan rəsmi İrəvan kapituliyasiya aktında üzərinə götürdüyü öhdəliklərə sadiq qalmır. Ekspertlər isə deyir ki, belə olan halda sülh müqaviləsinin imzalanmasına dair fikirlər sual altına düşür.