Suriyada düşərgədə saxlanılan Azərbaycan vətəndaşları ölkəmizə qaytarılıb

Avqustun 3-də Suriyanın Amerna düşərgəsində saxlanılan Azərbaycan vətəndaşı olan 16 nəfərin repatriasiyası həyata keçirilib.

Bu barədə Xarici İşlər Nazirliyindən məlumat verilib. Repatriantların 3-ü qadın, 13-ü uşaqdır. Uşaqlardan 1-i hər 2 valideynini itirib. Azərbaycan hökuməti tərəfindən görülən mərhələli və koordinasiyalı tədbirlər nəticəsində qeyd olunan şəxslərin ölkəmizə gətirilməsi baş tutub. Bu prosesin reallaşmasına Türkiyə dəstək verib.

Əvvəl Vətənə repatriasiyası nəzərdə tutulan vətəndaşların yeri, şəxsiyyəti və Azərbaycan vətəndaşlığına mənsubiyyəti müəyyən edilərək razılıq əsasında onların Türkiyə ərazisinə keçidi təmin olunub. İraq və Suriyadan Azərbaycan vətəndaşlarının repatriasiyasına məsul işçi qrupa daxil olan aidiyyəti dövlət qurumlarının nümayəndələri həmin repatriantların vətənə qayıdışı üçün Türkiyəyə ezam edilib. Sözügedən şəxslərin ilkin tibbi və psixoloji müayinəsi həyata keçirilib və onlara zəruri yardım göstərilib.

Azərbaycanın Türkiyədəki Səfirliyi tərəfindən ölkəyə qayıtması üçün vətəndaşlarımız Azərbaycana qayıdış şəhadətnamələri və müvafiq təyyarə biletləri ilə təmin edilib. Həmin şəxslərin reinteqrasiyası və reabilitasiyası üçün bütün lazımi tədbirlərin görülməsi nəzərdə tutulub.