Tapşırıq verildi: Fransa İrəvanı silahlandırır

Fransa Ermənistana hərbi dəstək verməyi planlaşdırır.

Belə ki, ölkənin xarici işlər naziri Ketrin Kolonna “France 2” telekanalının efirində bildirib ki, o, Müdafiə Nazirliyinin rəhbəri Sebastyan Lekorna Fransanın Ermənistana hərbi yardım göstərmək qabiliyyətini qiymətləndirməyi tapşırıb. Xarici işlər naziri Parisin İrəvana tədarük edə biləcəyi silah növlərinin adını çəkməkdən imtina edib və şərtlər barədə açıqlama verməyib.

Bütün bunların fonunda “France 2” telekanalında nazir Kolonna Qarabağda guya “etnik təmizləmə”nin aparıldığını deyib və o, Avropa Parlamentinin işlətdiyi ifadəni təsdiqləyib. Günlərdir ki, yerli və xarici mətbuatda yayımlanan, sosial şəbəkələrdə fasiləsiz paylaşılan görüntülərdən xanım Kolonnanın, yəqin ki, xəbəri yoxdur. Xəbəri yoxdur ki, Qarabağdan gedən ermənilər ərazini öz istəkləri ilə tərk etdiklərini bildirir, azərbaycanlılar isə onlarla birlikdə yaşamağı təklif edirlər. Hansı “etnik təmizləmə”dən söhbət getdiyi, düzü, bizə də maraqlıdır.