Təyyarə niyə Mahaçqalaya enmədi? | Rusiyalı politoloq AZAL təyyarəsinin vurulmasından danışdı

“Bəli, bu təyyarə ilə hər şey həmişəki kimidir: yalan və hiylə. Elə suallar var ki, onlara aydın cavab vermək lazımdır. “Bağışlayın, müharibə zamanı dəhşətli səhvlər olur” üslubunda açıq etiraf və bəyanatlar əvəzinə, təbliğat xarakterli söz oyunları aparırlar və nəticədə kifayət qədər dost Azərbaycanla birdən-birə münaqişə yaranır. Bunun kimə xeyri var?!”.

Bunu rusiyalı jurnalist və politoloq Maksim Şevçenko yazıb.

“Yəqin ki, Rusiyada belə bir lobbi var. Tutaq ki, təyyarə Rusiyanın hava hücumundan müdafiəsi tərəfindən atəşə tutulub. Bu, təəccüblü deyil, çünki müasir hava hücumundan müdafiə sistemi optik nişangah vasitəsilə deyil, radar ekranındakı işarə ilə atəş açır və Rusiya hər gün Ukrayna ilə onlarla hücum pilotsuz təyyarə mübadiləsi aparır. Əslində isə bu iki ölkə arasında genişmiqyaslı müharibə gedir. Təbii ki, böyük bir hava hədəfinin Qroznıya yaxınlaşdığını görən operator “atəş” əmrini verib. Bu, hər bir ağlı başında olan hava hücumundan müdafiə zabitinin vəzifəsidir. Hərbçilərin qərarı düzgündür. Günah təyyarəni inadla döyüş bölgəsinə istiqamətləndirən şəxslərdədir. Ukrayna pilotsuz təyyarələrinin Qroznıya qəfildən başlamayan hücumu zamanı qonşu Bakıdan uçan təyyarənin əvvəlcədən yaxınlıqdakı digər aerodroma yönləndirilmədiyini nə ilə izah etmək olar?

Qroznıya ən yaxın aerodromlar Dağıstanda Mahaçqala, İnquşetiyada Maqas, Osetiyada Beslandır. Niyə təyyarəni Mahaçqalaya endirmədikləri də aydın deyil. Pilotlara dərc olunmuş danışıqlarda əsasən, bu, ən sadə və təbii həll yolu idi. Təyyarə Qroznıya enə bilməyib. Çünki orada əslində hava döyüşü gedirdi. Mahaçqalada isə rahat eniş edə bilərdi. Mahaçqalaya və Dağıstanın ən böyük hava limanının sahiblərinə hər hansı sualı olan varmı? Qazaxıstana uçmağa kim qərar verib?”, – o bildirib.