Trampın diplomatik prioritetləri: Qafqaz və Orta Şərq | GLOBAL PANORAMA

Baku TV-nin “Global Panorama” verilişinin yeni buraxılışı yayımlanıb.

Proqramda Donald Trampın yenidən ABŞ Prezidenti seçilməsi ilə bu ölkənin xarici siyasətində və ümumilikdə qlobal siyasətdə gözlənilən dəyişikliklərdən, Amerika xalqının son seçiminin vəd etdiyi siyasi-iqtisadi perspektivlərdən bəhs edilib.

Bildirilib ki, ABŞ-nin 47-ci Prezidenti olan D.Tramp dövlət başçısı kimi ilk çıxışını edib və iddialı fikirlər səsləndirib:

“Məsələn, o vəd edib ki, Amerika çiçəklənəcək və bütün dünyada hörmət qazanacaq.

Bundan başqa, yeni Prezident ABŞ-nin təhlükəsizliyinin gücləndiriləcəyini, Meksika ilə sərhəddə fövqəladə vəziyyət elan ediləcəyini, qanunsuz miqrant axınını dayandırmaq üçün oraya qoşun göndəriləcəyini, Panama kanalına nəzarətin bərpa ediləcəyini, ölkə ərazisinin genişləndirilməsinə və Marsın tədqiq edilməsinə çalışacağını bildirib.

D.Trampın daha bir maraqlı açıqlaması isə Amerika qanunvericiliyində yalnız kişi və qadın cinslərinin nəzərdə tutulması ilə bağlı olub”.

Vurğulanıb ki, D.Tramp ikinci hakimiyyəti dövründə qlobal siyasətdə yeni istiqamətlərə yol aça bilər. O, bir çox regionlarda, o cümlədən Orta Şərqdə və Cənubi Qafqazda ABŞ-nin siyasi-iqtisadi maraqlarını təmin etməyə çalışmaqla yeni dinamika yarada bilər:

“Əgər rəsmi Vaşinqtonun Cənubi Qafqazdakı maraqları enerji resurslarının davamlı nəqli və Rusiyadan yan keçən beynəlxalq nəqliyyat dəhlizinin inkişafı ilə bağlıdırsa, Orta Şərqdə söhbət daha çox anti-İran ritorikasının və İsrailə dəstəyin gücləndirilməsindən gedə bilər.

D.Tramp həm də Rusiya-Ukrayna müharibəsinin dayandırılması, münaqişənin dondurulması istiqamətində qeyri-adi diplomatik təkliflər irəli sürə bilər.

Beləliklə, ABŞ-nin yeni Prezidenti qlobal balansı əsaslı şəkildə dəyişmək potensialına malikdir”.