Türkiyəli nazir Zəngəzur dəhlizinin Türk dünyasına birbaşa çıxış verəcəyini bildirib - Baku TV

“Zəngəzur dəhlizi dünyadakı ən yüksək tutumlu dəhlizlərdən biri olacaq”.

Bu sözləri Türkiyənin nəqliyyat və infrastruktur naziri Abdulkadir Uraloğlu deyib.

O bildirib ki, dünyadakı risklər nəzərə alındıqda alternativ dəhlizlər çox vacibdir və Zəngəzur dəhlizinin bu baxımdan əhəmiyyəti böyükdür.

“Bizə dəhlizin tutumu baxımından və fövqəladə vəziyyətlər üçün alternativlər lazımdır. Bu alternativləri biz yaratmalıyıq. Bura bizim üçün həqiqətən çox qiymətlidir. Eyni zamanda Türk dünyasına və Türk dövlətlərinə birbaşa nəqliyyat imkanı təmin edəcəyik”, – deyə nazir vurğulayıb.

Türkiyə nəqliyyat və infrastruktur naziri Abdulkadir Uraloğlu ölkəsinin Ermənistanla irəliyə doğru addımlar ata bilməsi üçün əvvəlcə Azərbaycanla razılığın əldə olunmasının vacib olduğunu da bildirib.

Hazırda danışıqların aparıldığını qeyd edən Uraloğlu Ermənistanın Zəngəzur dəhlizinə qarşı çıxmadığını da vurğulayıb:

“Ermənistanın əvvəlki və indiki nəqliyyat nazirləri ilə danışmışam. Onların Zəngəzur dəhlizinə qarşı çıxmaq kimi bir niyyətləri yoxdur. Azərbaycanla görüşlər aparılır və ABŞ Prezidenti Tramp da prosesi yaxından izləyir.

Azərbaycan və Ermənistan əvvəlcə oturub razılığa gəlməlidir. Ondan sonra biz Türkiyə olaraq yaxşı qonşuluq münasibətləri çərçivəsində Ermənistanla daha irəliyə doğru addımlar ata bilərik. Amma bizim üçün prezidentimizin yanaşması da bu yöndədir. Ermənistan Baş naziri Paşinyanın həqiqətən bu nöqtədə irəliləyiş üçün ciddi məsuliyyətlər götürdüyünü bilirik”.