Türkiyəni regionun liderinə çevirən Ərdoğan

Mayın 28-də keçiriləcək seçkilərin ikinci turunda Türkiyə xalqının hazırkı Prezident Rəcəb Tayyib Ərdoğana səs verməsi üçün ciddi əsaslar var. Çünki qardaş ölkənin son illərdə əldə etdiyi ardıcıl uğurlar məhz R.T.Ərdoğanın adı ilə bağlıdır. Siyasi elitanın düzgün strategiyası, vətəndaşların isə iqtidarla həmrəylik nümayiş etdirməsi xalqın hələ də mövcud hakimiyyətə etimadının göstəricisidir.

Təbii ki, Türkiyənin son illərdə ciddi inkişaf mərhələsinə qədəm qoyması və regional gücdən qlobal gücə çevrilməsi sirr deyil. Bunun nəticəsidir ki, böyük güclər bu reallığı qəbul edir və Türkiyə ilə əməkdaşlığa can atırlar. Bu isə mövcud nüfuzun gələcək perspektivdə yüksələn xətlə artmasından xəbər verir. Bütün bu nailiyyətlər isə məhz R.T.Ərdoğanın adı ilə bağlıdır.

Bu gün R.T.Ərdoğanın rəhbərliyi ilə nəinki Türkiyənin, bütün türk dünyasının hədəfləri müzakirə olunur. Yəni qardaş ölkə məhz R.T.Ərdoğanın liderliyi ilə gələcək hədəflərə doğru qətiyyətlə irəliləyir. Bu isə onun Türkiyənin 13-cü Prezidenti seçilməsini labüd edir.