Türkiyənin dəstəyi Qarabağ zəfərinə zəmin yaratdı

Azərbaycan-Türkiyə münasibətləri hər keçən gün daha da inkişaf edir. Şuşa Bəyannaməsi ilə bu əlaqələr mütərəqqi şəkil alaraq müttəfiqlik səviyyəsinə qədəm qoyub. Xüsusən də Prezident Rəcəb Tayyib Ərdoğanın rəhbərliyi ilə qardaş ölkənin Vətən müharibəsində Azərbaycana verdiyi dəstək danılmazdır.

R.T.Ərdoğan dəfələrlə Prezident İlham Əliyevlə təmaslarında Azərbaycanın haqlı davasını dəstəkləyərək sona qədər dövlətimizin yanında olduğunu bildirib. 44 gün davam edən müharibədə də Türkiyənin mövqeyini dərhal ortaya qoyması Azərbaycanın təkcə döyüş meydanında deyil, diplomatiya sahəsində də qalib gəlməsinə şərait yaradıb. Bir sözlə, Azərbaycanın hərbi və siyasi gücü ilə yanaşı, Türkiyənin də diplomatik və mənəvi dəstəyi qələbənin qazanılmasında böyük rol oynayıb.

R.T.Ərdoğanın istər daxili, istərsə də xarici siyasətdəki qətiyyəti onun bu gün nüfuzlu şəxsiyyətə çevrilməsinə zəmin yaradıb. Türkiyənin son 20 ildə qüdrətli dövlətə çevrilməsi və dünya siyasi arenasında söz sahibi olması da məhz bu şəxsiyyətin adı ilə bağlıdır.