Ukrayna Çinin sülh təklifini geri çevirdi

Bu günlərdə Çin lideri Si Cinpinin Rusiyaya səfəri çərçivəsində Ukrayna ilə danışıqlar üçün irəli sürdüyü təkliflər paketi regionda gündəmin aktual mövzusuna çevrilib.

Belə ki, rəsmi Pekin Moskvaya Ukraynadakı müharibənin dayandırılması ilə bağlı təkliflərini verib. Bu təkliflərin tam detalları açıqlanmasa da, paketdə Rusiya Ordusunun Ukrayna ərazisindən çıxarılmasına dair müddəanın olmadığı bildirilib.

Ekspertlər bunun Ukrayna üçün qəbuledilməz olacağını, bu halda isə Çinin növbəti addım kimi Rusiyanı dəstəkləyəcəyini proqnozlaşdırırlar.

Hazırkı duruma rəsmi Kiyevin reaksiyası gecikməyib. Ukrayna Ali Radasının hakim “Xalqın xidmətçisi” partiyasından olan deputatı Yuri Kamelçuk bildirib ki, ölkəsinin ərazi bütövlüyünü təhdid edən istənilən təklif qəbuledilməzdir:

“Gələcəkdə nə olacağını görəcəyik. Amma indi Çinin irəli sürdüyü “sülh” təklifi qəbuledilməzdir. Çünki Rusiya tərəfdən heç bir konkret addım görmürük. Ukrayna üçün isə bir şey vacibdir: Rusiya qoşunlarının Ukrayna ərazisindən, o cümlədən Krım və Donbasdan tam çıxarılması, bütün hərbi əsirlərin təhvil verilməsi, ölkədən qaçırılmış mülki şəxslərin, uşaqların qaytarılması, reparasiya ödənişinin həyata keçirilməsi. Yalnız bundan sonra nədənsə danışmaq olar. Hələlik danışılası yalnız bir məsələ var: hərbi cinayətkar Putinin beynəlxalq tribunala, cinayət məhkəməsinə cəlb olunması”.