Velbinin istefa verməsinin səbəbi | Elə şeylər üzə çıxdı ki…

İngiltərədə erməni katolikos II Qareginə yaxınlığı ilə tanınan Anqlikan kilsəsinin rəhbəri, Kenterberi Arxiyepiskopu Castin Velbi hazırkı vəzifəsindən istefa verib.

Arxiyepiskopun adı uşaqlara qarşı zorakılıqla bağlı qalmaqalda hallanır.

2013-cü ildən bu vəzifədə olan C.Velbinin istefa verməsinə səbəb onun Anqlikan kilsəsində fəaliyyət göstərən keşiş Con Smitin Böyük Britaniya, Zimbabve və Cənubi Afrika kimi ölkələrdə təşkil edilən xristian tətil düşərgələrində uşaqlara qarşı zorakılıq tətbiq etməsi barədə məlumatı olduğu halda ötən illər ərzində bu həqiqəti ört-basdır etməsini üzə çıxaran hesabatın dərc edilməsi olub.

Arxiyepiskop ona qarşı artan təzyiqlərə reaksiya olaraq istefa verib.

Prezident İlham Əliyev tərəfindən qəbul edilməsinə, eləcə də təmaslar zamanı tolerant və sülhpərvər olduğunu göstərməyə çalışsa da, bütün ermənilərin katolikosu II Qareginə yaxınlığı ilə bilinən Castin Velbi ötən müddət ərzində ermənipərəst mövqeyi ilə yadda qalıb.

C.Velbinin postunu Qraham Uşer tuta bilər. Hazırkı Leyborist hökuməti onun və ya digər iqlim məsələlərinə həssas yanaşan dini liderin namizədliyinə müsbət yanaşa bilər.

Q.Uşer bir neçə gün öncə Kalidə keçirilmiş COP16 Anqlikan nümayəndə heyətinə rəhbərlik edib.