Xalq bunu yüksək qiymətləndirəcək | İlham Əliyev liderliyin məsuliyyətindən söz açdı

Prezident İlham Əliyev Davosda Çinin “China Global Television Network” telekanalına müsahibəsində çox sürətlə dəyişən dünyada liderliklə bağlı fikirlərini bölüşüb.

Prezident liderliyin böyük bir məsuliyyət olduğunu və liderin həmişə öz xalqına münasibətdə ədalətli olmalı olduğunu vurğulayıb:

“Heç vaxt xalqına yalan danışmamalısan, xalq bunu yüksək qiymətləndirəcək. Bəzən müəyyən siyasi səbəblər üzündən hakimiyyətə can atan liderlər çoxlu vədlər verir və sonra onları yerinə yetirmir və bu da məyusluğa, inamsızlığa, dünyanın müxtəlif yerlərində siyasi böhrana gətirib çıxarır”.

Dövlət başçısı 20 ildən artıq müddət ərzində həmişə Azərbaycan xalqına həqiqəti söylədiyini qeyd edib:

“Həmişə xalqıma “biz ədaləti bərpa edəcəyik” söyləmişəm və xalqım da mənə inanıb. 17 il hakimiyyətdə olandan sonra biz nəhayət, vəd etdiklərimizi yerinə yetirdik və suverenliyimizi, ərazi bütövlüyünü və ləyaqətimizi bərpa etdik”.