Xankəndidəki vətəndaşlarımıza humanitar yardım üçün ən qısa yol

Humanitar məsələrin həlli istiqamətində danışıqların aparılması Azərbaycanla Ermənistan arasında Brüssel formatında keçirilən görüşlərin mühim tərəflərindən biridir. Təsadüfi deyil ki, sonuncu Brüssel görüşündə də Qarabağda etnik erməni əhalinin sıx məskunlaşdığı ərazilərə humanitar yüklərin daşınmasının istiqamətinin dəyişdirilməsi də müzakirə edilib. Bu dəfə Avropa İttifaqı alternativ yoldan istifadənin mümkünlüyünü də təsdiqlədi. Bu məqsədlə isə Bərdə-Ağdam avtomobil yolu istifadə edilə bilər.

Əslində, Xankəndiyə ən qısa və rahat yol da məhz bu yoldur. Lakin sağ əlləri ilə sol qulaqlarını qaşımağa meyilli olan beynəlxalq təşkilatlar və Qarabağdakı separatçılar bu şərti eşidəndən sonra ciddi təşvişə düşüblər. İndiyədək Dövlət Sərhəd Xidməti Qızıl Xaçlı maşınlarda “humanitar yardım” adı altında qaçaqmalların keçirilməsi cəhdinin qarşısını dəfələrlə alıb. Beynəlxalq Qızıl Xaç Cəmiyyətinə edilən xəbərdarlığa baxmayaraq, nəinki zəruri addımlar atılmayııb, hətta bu qanunsuz əməllər təkrarlanıb. Belə olan halda həm ermənilərin, həm də havadarlarının yeni yolun istifadəyə düşməsinə görə niyə narahat olduqlarını anlamaq çətin deyil.

Bərdə-Ağdam avtomobil yolu nəqliyyat xidmətlərini daha da yaxşılaşdırmaqla yanaşı, həm də bölgədə turizmin inkişafına təsir edəcək, yük və sərnişin daşımalarında əsas rol oynayacaq, yük həcminin çoxalmasına və gəlirlərin artmasına imkan yaradacaq.