XİN-dən Makronun Kişineu görüşündən sonra verdiyi açıqlamaya cavab

Kişineuda “Avropa Siyasi Birliyi”nin 2-ci Zirvə toplantısı çərçivəsində Azərbaycan Prezidenti İlham Əliyev və Ermənistanın Baş naziri Nikol Paşinyan arasında Aİ Şurasının Prezidenti Şarl Mişelin, Fransa Prezidenti Emmanuel Makronun və Almaniya kansleri Olaf Şoltsun iştirakı ilə görüşün yekunları üzrə mətbuata açıqlama ənənəyə uyğun olaraq Brüssel formatının təşkilatçısı kimi Şarl Mişel tərəfindən verilib.

Bu barədə Xarici İşlər Nazirliyinin mətbuat katibi Ayxan Hacızadə Emmanuel Makron tərəfindən Azərbaycan və Ermənistan liderləri arasında Kişineu görüşünün nəticələrinə dair yayılmış bəyanat barədə yerli mətbuatın sualına cavabında bildirib.

“Fransa Prezidenti tərəfindən birtərəfli qaydada görüş barədə verilmiş açıqlama tərəflərin mövqeyini əks etdirmir və təhrif edir. Əfsuslar olsun ki, Fransa tərəfindən belə davranışın sərgilənməsi ilk hal deyil və bu, Azərbaycanla Ermənistan arasında sülh prosesinə, bölgədə sülh və sabitliyə heç də müsbət töhfə vermir”, – deyə XİN rəsmisi qeyd edib.