XİN-in apardığı danışıqlar nəticə verdi | Saxlanılan soydaşlarımız Çeçenistandan qaytarıldı

Çeçenistanda saxlanılan Azərbaycan vətəndaşları ölkəyə gətirilib.

Bu barədə Xarici İşlər Nazirliyinin mətbuat katibi Ayxan Hacızadə məlumat verib.

Bildirilib ki, Azərbaycan vətəndaşları – 1975-ci il təvəllüdlü Elxan Şirinov, 1982-ci il təvəllüdlü Vüqar Məhərrəmov və 2004-cü il təvəllüdlü Nihad Rzayevin ölkəmizə geri qaytarılması məqsədilə dərhal Rusiya Xarici İşlər Nazirliyinə nota ünvanlanıb, Rusiya XİN və digər aidiyyəti qurumlar ilə danışıqlar aparılıb.

“Vətəndaşlarımızın ölkəmizə geri qaytarılması istiqamətində aparılmış işlər nəticəsində qeyd edilən vətəndaşlarımızın 21 sentyabr tarixində Rusiya Federasiyası ilə dövlət sərhəd-keçid məntəqəsindən quru yolla Azərbaycana qayıdışı təmin edilib”, – deyə XİN rəsmisi vurğulayıb.

Qeyd edək ki, təqribən bir ay bundan əvvəl Çeçenistanda 3 Azərbaycan vətəndaşı – Elxan Şirinov, Vüqar Məhərrəmov və Nihad Rzayevin Rusiya Federasiyası miqrasiya qanunlarını pozmaları ittihamı ilə saxlanılmaları, daha sonra Elxan Şirinov və Vüqar Məhərrəmovun Ukraynada müharibəyə göndərilmək məqsədilə Qroznıda təlimlərə cəlb olunmaları barədə xəbərlər yayılmışdı.