YAP Fransanın ittihamlarına belə cavab verdi

Fransanın Xarici Rəqəmsal Müdaxilələrdən Müdafiə üzrə Dövlət Xidmətinin Yeni Kaledoniya hadisələri ilə bağlı Yeni Azərbaycan Partiyasını ittiham etməsi cavabsız qalmayıb.

“YAP-ı sosial şəbəkələrdə saxta məlumatlar yaymaqda və sistemli qaralama kampaniyası aparmaqda ittiham edənlər qərəzlidirlər”.

Bu fikirləri partiyanın Mərkəzi Aparatının şöbə müdiri Nurlan Qələndərli bildirib.

O qeyd edib ki, Azərbaycan söz, fikir və ifadə azadlığının təmin edildiyi demokratik ölkədir:

“Yeni Azərbaycan Partiyasının fəaliyyət prinsiplərindən biri siyasi plüralizmdir. Yəni partiya üzvləri ictimai-siyasi məsələlərlə əlaqədar öz fikirlərini kütləvi informasiya vasitələrində və sosial mediada sərbəst ifadə edə bilərlər”.

Nurlan Qələndərli vurğulayıb ki, bu gün sosial medianın müxtəlif seqmentlərinə, xüsusilə də “X” və “Facebook” platformalarına nəzər saldıqda Fransanın ondan 17 000 kilometr uzaqda yerləşən Yeni Kaledoniyada mütərəqqi dünyanın sivil dəyərlərinə zidd həyata keçirdiyi neokolonialist siyasətinin müxtəlif ölkələrdən olan insanların tənqidinə məruz qaldığını, ciddi etiraz və narazılıqlarla qarşılandığını görürük:

“Azərbaycan vətəndaşlarının, o cümlədən 700 mindən artıq insanı öz sıralarında birləşdirən Yeni Azərbaycan Partiyasının üzvlərinin bu məsələ ilə əlaqədar fərdi münasibət bildirmələri də təbiidir.

Bu, Fransa rəsmilərinin də siyasi leksikonunu bəzəyən “demokratik” dəyərlərə, o cümlədən söz və fikir azadlığına tamamilə uyğundur və hər hansı bir sistemli qara piar kampaniyasının tərkib hissəsi kimi qiymətləndirilə bilməz”.

YAP rəsmisi bu saxta ittihamı tirajlayan bəzi KİV nümayəndələrini diqqətli olmağa, media və sosial şəbəkələrdə xəbər paylaşarkən jurnalistikanın dəqiqlik prinsipini əsas götürməyə və dezinformasiya yaymamağa çağırıb.